عندما قال عادل إمام "هلعب مع الخسران"

ما هو أجمل فيلم لعادل إمام ؟ سؤال صعب جدا

عادل قدر خلال تاريخه الفني يقدم أدوار متنوعة، وقدر ينجح فى أدوار كتير مختلفة عن طبيعة الجسمانية والنفسية.

عادل قدر يفرض شخصيته وأحاسيسه على أدوار كتير، وقدر يقدم السينما التجارية ناجحه زي ما قدر يقدم السينما اللى فيها فن، زي ما قدم مع أفلام هامة مع شريف عرفة ، ويعتبر فيلم المنسي واحد من أجمل أفلام عادل إمام فعلا لكن احنا هنا بنطرح سؤال واحد وبسيط؟

إيه أجمل فيلم لعادل امام؟

رائي الشخصي: الحريف

ليه الحريف أجمل فيلم لعادل إمام؟

لأن عادل إمام قدر فى فيلم الحريف يسيب نفسه بشكل كامل للمخرج محمد خان ،عادل نفسه مش بيحب الفيلم لأنه فشل تجاريا، ورفض يشتغل تانى مع محمد خان .

بس الفيلم يعتبر واحد من الافلام اللى عادل ظهر كأنه واحد من عائلة محمد خان الفنية، مع أن الشخصية اللى قدمها بسيطة وشبه ناس كتير وهي من نوعية الأدوار اللى بيحبها عادل إمام.

بس الاختلاف هنا، أنه مش بينتصر فى أخر الفيلم، و تعتبر الشخصية الوحيدة اللى مش بتنصر في اخر أفلام عادل إمام.

عادل في الدور ده أعتمد على روحه الحلوة مش كوميدية الأحداث، الفيلم ده لو عمله حد تاني غير عادل كنت هتخس بكم السوداوية الموجودة فى الشخصية ، محمد خان كمخرج يعتبر واحد من أجمل المخرجين اللي قدروا يقدموا لنا صورة حلوة وتاريخية للقاهرة و شوارعها و عن أهل القاهرة .

شوف يا صديقي المخرج محمد خان ازاي قدم الفخراني فى فيلم خرج ولم يعد وشوف ازاي قدم الفيشاوي في مشوار عمر وشوف ازاي قدم أحمد زكي أكثر من مرة وكل مرة تحس أنك

قدام ممثل جديد ، يعتبر فيلم الحريف جزء من سلسلة فارس الذي قدم الجزء الأول منه أحمد زكي وقدم الجزء الثاني عادل امام و قدم الجزء الثالث محمود حميده (فارس المدينة)

الحقيقة انا مقدرش أحب الجزء الأول من الفيلم لأن الشخصية كانت شديدة السوداوية فمع أداء أحمد زكي كان شديد الكآبة، وعبد الله فرغلي قدم دور تاريخي في الفيلم ده، وقدم دور المعلم المصاب،وكان لاعب كرة ولما خان اتعاقب وأصبح الأعرج.ومن هنا خد الحكمة.

تشعر أن الفيلم تجسيد لمأساة يونانية قديمة،المصاب الذي يحذر البطل ولكن البطل يكمل فى طريقه إلي النهاية، كأنه لا يملك خيار ، كأن قرارتنا تنبع من المدينة وليس لنا دخل ، فالمدينة هنا الفاعل، و الفيلم مأخوذ عن شخصيات حقيقة ورياضة اندثرت بالفعل ،عبقرية خان الحقيقة أنه يرى الجمال في أشياء لا ترى فيها جمال،يكفي مشهد ادارك فارس لوفاة والدته يسأله بعده والده معاك سيجارة،أن المدينة تضغط على الجميع وتأكل الجميع ولا ينجو منها سوى الحريف.